माताजी

Mataji

કથા

ક્યાંક દરિયો અને ક્યાંક રણની કથા,
જિંદગી એટલે, આવરણની કથા !

આમ અકબંધ સંબંધની વારતા,
આમ, અણછાજતા અવતરણની કથા !

એ અલગ વાત છે કે, ન ભૂલી શકો,
પણ સ્મરણ માત્ર , છે વિસ્મરણની કથા !

શક્ય છે મત જુદો હોય દરિયા વિષે,
લોકજીભે ચડી છે, હરણની કથા !

સુર્ય જેવી નથી શખ્સિયત કોઇની,
છે ઉદય-અસ્ત વાતાવરણની કથા !

હરપળે અવતરે છે નવી શક્યતા,
ને પછી વિસ્તરે, વિસ્તરણની કથા,

કોઇ રસ્તો તફાવત નથી જાણતો,
પણ, બદલતી રહે છે ચરણની કથા !

નામ આપી ભલે મન મનાવો તમે,
પણ ખરેખર બેનામ, ક્ષણની કથા !

જિંદગી જિંદગી શું કરો છો બધા?
જિંદગી એટલે કે, મરણની કથા !!

~ ડૉ. મહેશ રાવલ

કારણ, કોણ પૂછે છે ?

પવન ફરવાનું કારણ, કોણ પૂછે છે
કશુંક ખરવાનું કારણ, કોણ પૂછે છે !

નથી હોતું કશું અપવાદ જેવું કંઈ
સમય સરવાનું કારણ કોણ પૂછે છે

ગણીને માત્ર ગાંઠે બાંધશે,કિસ્સા
જતું કરવાનું કારણ, કોણ પૂછે છે !

મળે તો એમ, જાણે સાતભવનું સખ
નજર ફરવાનું કારણ, કોણ પૂછે છે !

ગયા એ પણ, અને જાનાર છે એ પણ
કદી, મરવાનું કારણ કોણ પૂછે છે !

બધાને ખ્યાલ છે,પથરા નથી તરતા
છતાં, તરવાનું કારણ કોણ પૂછે છે !


ડો.મહેશ રાવલ